 |
Gweinidog: Parch. Wyn Rhys Morris, Berwynfa, Penrhyn-coch, Aberystwyth, SY23 3EW. 01970 820939 Ysgrifennydd: Mr Alan Wynne Jones |
 |
Croeso i Wefan Capel y Garn Pwrpas y wefan yma yw rhannu gwybodaeth am Gapel y Garn, Bow Street, Aberystwyth, ac estyn gwahoddiad cynnes i chi i droi i mewn i gyd-addoli gyda ni ar y Sul neu ymuno yn y gwahanol weithgareddau a gynhelir gan yr eglwys. Ers ei sefydlu tua 1793, mae i'r eglwys hanes maith a chyfoethog o hyrwyddo'r dystiolaeth Gristnogol yn yr ardal, a'n gobaith yw y bydd y wefan yn un ffordd arall o gyflawni hyn i'r dyfodol. Amserau cwrddFel arfer, cynhelir gwasanaethau yn y capel bob Sul am 10 a 5 o'r gloch, ac mae ysgol Sul i'r plant yn ystod gwasanaeth y bore.Mae Capel y Garn yn un o saith eglwys sydd yng ngofalaeth y Garn, dan weinidogaeth y Parchedig Wyn Rhys Morris, ac fe gynhelir oedfaon arbennig i holl eglwysi'r ofalaeth, er enghraifft, oedfa Gŵyl Ddewi, oedfa ar fore'r Pasg ac oedfa'r Nadolig. Bydd yr oedfaon hyn yn cael eu cynnal am 10 o'r gloch, ac ni fydd gwasanaeth nos yn y Garn ar y Suliau hynny. Byddwn hefyd yn cydaddoli'n rheolaidd â chynulleidfa Capel Noddfa, eglwys yr Annibynwyryn y pentref.  GweithgarwchMae nifer o weithgareddau yn cael eu cynnal yn y capel yn rheolaidd, er enghraifft, cyfarfodydd Cymdeithas y Chwiorydd a'r Gymdeithas Lenyddol, a bydd y Garn yn cymryd rhan yn flynyddol yng Nghymanfa Ganu Unedig Gogledd Aberteifi.Gwaith gwirfoddolRhoddir llawer o bwyslais yn y Garn ar waith gwirfoddol a chodi arian i helpu pobl anghenus, er enghraifft, casglu bwyd i Bosnia dan ofal y Grŵp Help Llaw a chefnogi apêl flynyddol Cymorth CristnogolMae'r Garn hefyd wedi ymrwymo i fod yn eglwys masnach deg Trowch i mewn atomUn o eglwysi Eglwys Bresbyteraidd Cymru yw'r Garn, ond mae i unrhyw un droi i mewn atom ac ymuno yn ein haddoliad neu gymryd rhan yn ein gweithgareddau. Am ragor o fanylion, gweler y dyddiadur neu Gair o'r Garn, cylchlythyr yr eglwys, a gyhoeddir bedair gwaith y flwyddyn. Fe gyfeirir yn y crynodeb o hanes yr Eglwys at Ddiwygiad 1904–05 yn cyffwrdd â'r ardal hon ac am y miloedd a ddaeth ym Mehefin 1905, ychydig dros ganrif yn ôl, i addoli a moli Duw yn y capel hwn, ac yn y caeau o'i gwmpas. Ganrif yn ddiweddarach mae'r nifer yn dipyn llai, ond mae yma o hyd gyfeillgarwch a chynhesrwydd a brwdfrydedd. Rydym yn eglwys sydd yn edrych allan ac yn ymwybodol iawn o'r angen sydd yn ein byd, ac o'r herwydd mae yma gyfrannu hael a chyson. Ond rydym hefyd yn ymwybodol fod angen arall yn ein plith. Ganrif yn ôl, dod heb eu cymell a wnâi pobl i addoli Duw. Drwy'r wefan hon, gallwn nid yn unig ddweud peth o'n hanes, ond hefyd wahodd pobl i ddeialog, i ystyried, i bwyso'r hyn a ddywedir ac, efallai, i uno gyda ni yn ein haddoliad. Yr un yw'r neges heddiw ag erioed: O'r fath gyfaill ydyw'r Iesu, Ffrind ym mhob ystorom gref. |
Newyddion o'r GarnOedfaon y Pasg Cafwyd dwy oedfa arbennig i eglwysi'r ofalaeth dros gyfnod y Pasg, dan arweiniad y Bugail. Cynhaliwyd oedfa bore'r Groglith yng Nghapel Rehoboth, ac fe seiliodd y Bugail ei neges ar faddeuant. Yng Nghapel y Garn yr oedd oedfa gymun bore'r Pasg, a'r Bugail yn ein hatgoffa fod neges y Pasg yn cynnig: maddeuant am y gorffennol, llawenydd i'r presennol a gobaith i'r dyfodol. Cafwyd dwy oedfa fendithiol iawn a braf oedd gallu croesawu cynulleidfa dda ar y ddau achlysur. I ddarllen mwy am y project Maddeuant, ewch i Delweddau Maddeuant Gair o'r Garn Mae'r rhifyn diweddaraf, Gwanwyn 2012, bellach ar gael. I ddarllen copi, ewch i Gair o'r Garn Gair o'r Garn i'r Plant Am gopi o Dudalen y Plant, cliciwch Plant Cymdeithas Lenyddol y Garn Yng Nghapel Bethlem, Llandre, nos Wener 16 o Fawrth, dathlodd 27 o aelodau'r gymdeithas Ŵyl Dewi mewn steil gyda chawl cig eidion a tharten afal a hufen. Gŵr gwadd y noson oedd Mr Iestyn Hughes, ac fe'n diddanwyd gyda rhinweddau tynnu lluniau a'r ffordd i wneud y gorau o'n camera digidol. Codwyd £55.00 at elusen o ddewis y gŵr gwadd, sef Ambiwlans Awyr Cymru. Cwrdd Gweddi Byd-eang y Chwiorydd Pnawn Gwener, 5 Mawrth, unodd chwiorydd y Garn gyda chwiorydd Capel Noddfa ac Eglwys Llanfihangel Genau'r Glyn i gynnal y cwrdd gweddi blynyddol a hynny yng Nghapel Noddfa eleni. Lluniwyd y gwasanaeth gan chwiorydd Malaysia, a'i thema oedd 'Boed i Gyfiawnder Lwyddo'. Rhoddwyd yr anerchiad gan Mrs Mair Lewis. Gwasanaeth Gŵyl Ddewi'r Ofalaeth Bore Sul, 26 Chwefror 2012, cynhaliwyd oedfa flynyddol yr ofalaeth i ddathlu Gŵyl Ddewi. Roedd y gwasanaeth dan arweiniad y Gweinidog a chyflwynodd y plant adnodau a phenillion addas ar gyfer yr achlysur cyn mynd i'r ysgol Sul yn y festri. Hyfryd oedd eu gweld yn eu gwisgoedd traddodiadol lliwgar. Gwnaed casgliad tuag at 'Llyfrau Llafar Cymru' Am eitemau newyddion blaenorol ewch i'r archif Am luniau o Gapel y Gerlan, y Borth cliciwch Lluniau'r Gerlan Taith Dewi Sant, Hydref 2010 Am adroddiadau ar y genhadaeth, canlyniadau'r holiadur ac adnoddau a ddefnyddiwyd yn ystod y daith, cliciwch Taith Dewi Sant I'ch dyddiadur... Ysgol Sul y Plant Bob bore Sul, am 10 o'r gloch - croeso cynnes i blant a phobl ifanc o bob oed Cymanfa Ganu Gogledd Ceredigion Capel Bethel, Tal-y-bont, dydd Sul, 13 Mai. Cyfarfod y plant am 10 o'r gloch; cymanfa'r oedolion am 5.30 o'r gloch dan arweiniad Dr Rhidian Griffiths. Am fanylion y rihyrsals, ewch i'r dyddiadur Sul Cymorth Cristnogol 20 Mai 2012. Oedfa deuluol dan arweiniad y Bugail am 10.30 o'r gloch a chinio bara a chaws i bawb yn dilyn. Bydd y casgliad wrth y byrddau cinio yn mynd at Apêl Guatemala, Eglwys Bresbyteraidd Cymru. Gŵyl yr ysgol Sul Dydd Sul, 1 Gorffennaf 2012, yn y Morlan, Aberystwyth, am 11 o'r gloch. Arweinwyr: Owain Edwards ac Efan Miles Williams. Thema: Taith. Croeso cynnes i bawb. Am restr lawn o ddigwyddiadau ewch i'r dyddiadur |
©Hawlfraint Ymddiriedolwyr Capel y Garn yw cynnwys gwreiddiol y safle. All original material on the site is copyright by the Trustees of Capel y Garn.
Crewyd y wefan/Website created by Technoleg Taliesin Cyf. - Admin/Gweinyddu