Archif newyddion Capel y Garn 2008-9

Am archif newyddion 2007, cliciwch yma.

Am archif newyddion 2006, cliciwch yma.

Am deyrngedau er cof am rai o aelodau'r Garn, cliciwch yma.

Llongyfarchiadau calonnog

i Alun a Siân, Caergywydd, ar enedigaeth merch fach, Hanna, ddydd Llun, 28 Rhagfyr, chwaer fach i William a Gerwyn, a'r wyres gyntaf i Ray Evans, Maes Ceiro.

Garn Werdd

Dymuna'r Grŵp Help Llaw ddiolch i bawb a gyfrannodd stampiau ar gyfer OXFAM a chardiau Nadolig i'w hailgylchu er budd Coed Cadw.

Oedfa bore'r Nadolig

Daeth nifer ynghyd am 9 o'r gloch i ddathlu'r Nadolig mewn oedfa gymun dan arweiniad y Gweinidog. Cafwyd neges bwrpasol ganddo, a da oedd gweld rhai o 'blant yr Eglwys' ac aelodau o eglwysi eraill yn ymuno â ni yn y gwasanaeth.

Sul cyn y Nadolig

Er gwaetha'r tywydd gaeafol, cynhaliwyd dwy oedfa i baratoi ein hunain ar gyfer yr Ŵyl. Yn y bore, arweiniwyd y gwasanaeth gan y Parch J E Wynne Davies, a'i thema oedd: 'Llawenychasant â llawenydd mawr pan welsant y seren.' Gwasanaeth y Garol a'r Gair a gafwyd yn yr hwyr, a chymerwyd rhan gan nifer o ieuenctid ac aelodau'r eglwys. Trefnwyd y gwasanaeth gan ein Gweinidog, a chyfeiliwyd gan Alan Wynne Jones, gyda chymorth Gwern, Iestyn a Ffion.

Llongyfarchiadau calonnog

i Alun ac Enid Jones ar ddod yn daid a nain unwaith eto. Ganed mab bach, Deio, i Gwion a Manon yn Nefyn ar 10 Rhagfyr; hefyd i Carys a Siôn Owen ar enedigaeth mab bach, Deio Elis, a aned ar 15 Rhagfyr, ŵyr i Ambrose a Margaret Roberts.

Oedfa Nadolig Plant yr Ofalaeth

Cynhaliwyd oedfa Nadolig y plant bore Sul, 13 Rhagfyr 2009, yng Nghapel y Garn. Cyflwynwyd stori'r Nadolig (gydag ambell ychwanegiad cyfoes) gan blant yr ysgol Sul, ac yn dilyn hynny fe gafwyd neges bwrpasol gan y Gweinidog. Yn dilyn y gwasanaeth cafwyd parti yn y festri i'r plant oedd wedi cymryd rhan yn y cyflwyniad.

Operation Christmas Child

Unwaith eto eleni bu'r Grŵp Help Llaw yn gyfrifol am gydlynu'r ymgyrch hon. Derbyniwyd 59 o focsys wedi'u llenwi i'r ymylon a £258 mewn rhoddion ariannol. Diolch am eich cefnogaeth, ac i Ysgol Sul Capel Seion am ymuno gyda ni eleni.

Cydymdeimlwn yn ddwys

â Gill a Glyn Saunders Jones a'r teulu ar farwolaeth mam Gill, sef Mrs Renee Edwards, Rhuthun, ar 4 Rhagfyr.

Ffair y Garn

Cynhaliwyd y ffair flynyddol bore Sadwrn, 28 Tachwedd 2009, yn Neuadd Rhydypennau. Fe'i hagorwyd gan Alan ac Ann Wynne Jones a chyflwynwyd blodau iddynt gan William a Gerwyn, Caergywydd. Cafwyd cyfle i brynu nwyddau amrywiol y stondinau lliwgar a rhoi cynnig ar sawl cystadleuaeth Trefnwyd y ffair eleni eto gan y Chwiorydd a chafwyd cefnogaeth dda i'r achlysur.

Sul yr Urdd

Cynhaliwyd gwasanaeth arbennig bore Sul, 15 Tachwedd 2009, dan arweiniad y Gweinidog i nodi Sul yr Urdd. Soniodd Wynne Melville Jones am arwyddair y mudiad, a chafwyd ymweliad annisgwyl gan neb llai na Mistar Urdd ei hun. Yn ystod y gwasanaeth bedyddiwyd Gruffydd Siôn, mab Geraint a Nia, a brawd Lleucu; a Tomos Llywelyn, mab Chris a Carwen, a brawd Lois.

Cwrdd Diolchgarwch Bethlehem

Cynhaliwyd y cwrdd diolchgarwch blynyddol nos Iau, 22 Hydref, dan arweiniad y Parch. Cen Llwyd.

Llongyfarchiadau calonnog

i Elfyn ac Anna ar enedigaeth merch fach, Lois Elfyn, ar 20 Hydref, wyres fach gyntaf Liz Jones.

Cydymdeimlwn yn ddwys

â Gwen ac Ian Cole ar farwolaeth tad Gwen, John Edwards, ddydd Sul, 18 Hydref.

Gwasanaeth Diolchgarwch

Daeth cynulleidfa luosog ynghyd i wasanaeth diolchgarwch yr ofalaeth yng Nghapel y Garn, bore Sul, 11 Hydref dan arweiniad y Gweinidog, y Parch Wyn Morris. Thema'r gwasanaeth oedd 'Bod yn ddiolchgar', yn seiledig ar hanes Iesu'n iacháu'r deg gwahanglwyf. Cymerwyd rhan gan blant yr ysgol Sul a rhai o rieni ifainc yr eglwys, a chafwyd cyflwyniad gweledol i atgyfnerthu'r neges. Gwnaed casgliad tuag at Gyngor yr ysgolion Sul a'r NSPCC.

Sul Croeso Nôl

Cynhaliwyd gwasanaeth arbennig o groeso fore Sul, 20 Medi, dan arweiniad y Gweinidog, a braf oedd gweld cynulleidfa dda wedi dod ynghyd ar gyfer yr oedfa. Defnyddiwyd amrywiol ddulliau, yn gyflwyniad gweledol, dramodig i'r plant, darlleniadau, gweddïau ac anerchiad i gyfleu hanes Sacheus, a'i neges i ni heddiw.

Llongyfarchiadau a phob dymuniad da

i Ann Evans, Caergywydd gynt, ar ei phriodas ag Ian Elias yn Efrog Newydd ar 4 Medi.

Llongyfarchiadau

i Dilys a Vernon Jones ar enedigaeth wyres, Ela Grug, ar 2 Medi, merch i Non a Gerwyn, a chwaer fach i Glain Erin.

Ieuenctid dawnus

Llongyfarchiadau i Gwyneth Keyworth ar ei chanlyniadau Safon Uwch ac ar ei hymddangosiad yn y ffilm Framed a ddarlledwyd ar BBC1 nos Lun, 30 Awst; ac i Iwan Williams ar ei ganlyniadau ardderchog yn ei arholiadau TGAU.

Llongyfarchiadau calonnog iawn

i Delyth a Rheinallt Morgan ar enedigaeth merch fach, Gwawr Eluned, chwaer i Glesni a Teleri; i Geraint a Nia Williams ar enedigaeth mab bach, Gruffydd Siôn, brawd i Lleucu Siôn; i Carwen a Chris Jones ar enedigaeth mab bach, Tomos Llywelyn, brawd i Lois Medi; ac i Lowri ac Owain Schiavone ar enedigaeth mab bach, Llew Ifan. Mae'r argoelion yn dda ar gyfer dyfodol yr ysgol Sul!

Llongyfarchiadau

i Vernon Jones ar ei lwyddiant yn ennill y wobr gyntaf am delyneg ar y testun 'Gafael' yn Eisteddfod Genedlaethol y Bala.

Cofio BJ

Ar drothwy Eisteddfod Genedlaethol y Bala, cyhoeddwyd cyfrol o atgofion am Buddug James: Brenhines y Ddrama, a fu mor ffyddlon a gweithgar yn y Garn, yn enwedig gyda'r ysgol Sul a'r ieuenctid. Mae'r gyfrol yn cynnwys cyfraniadau gan nifer o'r aelodau a thrigolion yr ardal, ac yn deyrnged deilwng i gymeriad unigryw.

Grŵp Help Llaw

Cynhaliwyd 'Te Prynhawn' ddydd Sadwrn, 25 Gorffennaf, yng ngardd Pantyperan, Llandre, i godi arian at Apêl Huw Edwards, i brynu cadair olwyn arbenigol i Huw. Roeddem yn falch o gael cwmni Huw yn y digwyddiad, ac fe godwyd dros £2,000 tuag at yr apêl.

Dymuniadau gorau

i Mrs Linda Jones ar ei hymddeoliad fel athrawes yn ysgol Rhydypennau ers nifer fawr o flynyddoedd.

Llongyfarchiadau calonnog

i Alun ac Enid Jones ar ddod yn daid a nain i efeilliaid. Ganed mab a merch, Iolo a Branwen, i Garmon a Lowri yng Nghaerdydd ar 12 Gorffennaf.

Oedfa Haf yr Ofalaeth

Bore Sul, 12 Gorffennaf 2009, cynhaliwyd oedfa haf yr ofalaeth yng Nghapel Madog dan arweiniad y Gweinidog, a braf oedd gweld cynulleidfa deilwng wedi dod ynghyd i'r achlysur arbennig hwn.

Te Bethlehem

Nos Wener, 5 Mehefin cynhaliwyd y te blynyddol yn ysgoldy Bethlehem, Llandre. Y gwesteion arbennig oedd Wynne a Linda Melville Jones, a darparwyd yr adloniant gan Bryn Roberts a Kathleen Lewis.

Arhoswch! ... yn enw Duw

Bore Sadwrn 30 Mai, daeth rhai o aelodau'r ofalaeth at ei gilydd i Gapel y Garn i dreulio munudau tawel o fyfyrdod a gweddi, dan arweiniad y Gweinidog. I ddarllen un o'r gweddïau a rhai pwyntiau gweddi, ewch i dudalen Myfyrdodau

Oedfa Cymorth Cristnogol yr Ofalaeth

Cynhaliwyd oedfa arbennig ar ddiwedd wythnos Cymorth Cristnogol fore Sul, 17 Mai 2009, dan arweiniad ein Gweinidog. Thema ei anerchiad oedd 'Cariad yw Duw': cariad sy'n adnabod, yn llifo ac yn trawsnewid. Yn dilyn yr oedfa, cynhaliwyd Cinio Bara a Chaws er budd Cymorth Cristnogol.

'Mae E'n Fyw'

Dyna oedd thema oedfa'r bore Cymanfa Unedig Gogledd Ceredigion ddydd Sul, 10 Mai 2009 yng Nghapel Bethel, Aberystwyth. Cymerwyd rhan gan blant ysgolion Sul y cylch a diolch i Iestyn, Gwern a Glesni am gyflwyno hanes y Daith i Emaus ar ran y Garn. Roedd yr oedfa dan arweiniad Andy Hughes, David Timothy a'r band, ac roedd yn hyfryd gweld tyrfa mor luosog yn bresennol. Cynhaliwyd cymanfa'r oedolion yn yr hwyr, dan arweiniad Mrs Carol Davies, Henllan.

Cydymdeimlwn

yn ddwys iawn â Mrs Ray Evans, Siân ac Ann, a theulu'r diweddar John Evans, Caergywydd, a fu farw ddydd Mercher, 6 Mai 2009.

Oedfaon y Pasg

Cynhaliwyd dwy oedfa gymun i'r ofalaeth dan arweiniad y Gweinidog dros gyfnod y Pasg - y gyntaf ar fore'r Groglith yng Nghapel Rehoboth, Taliesin, a'r ail ar fore Sul y Pasg yng Nghapel y Garn.

Cymorth i Bosnia

Cynhaliwyd bore coffi yn festri'r Garn bore Sadwrn, 21 Mawrth 2009, i godi arian tuag ymgyrch ddiweddaraf Eric Harris i gynorthwyo trigolion Mostar, Bosnia. Roedd y trefniadau dan ofal y Grŵp Help Llaw, a llwyddwyd i godi swm sylweddol tuag at yr achos arbennig hwn. Diolch i bawb am eu cefnogaeth.

Cymdeithas Lenyddol y Garn

I gloi'r tymor am eleni, nos Wener, 20 Mawrth, aeth aelodau'r Gymdeithas i'r Llyfrgell Genedlaethol. Yno, mwynhawyd detholiad o ffilmiau Cymreig, gan gynnwys y clasur Noson Lawen - a ddaeth â llawer o atgofion nôl! Yna, ymlaen i Bendinas lle roedd bwffe wedi'i baratoi ar ein cyfer. Diweddglo blasus i flwyddyn lwyddiannus arall o gyfarfodydd.

Cwrdd Gweddi Byd-Eang y Chwiorydd

Ymunodd Chwiorydd y Garn ac Eglwys Llanfihangel Genau'r Glyn yn y cwrdd gweddi a gynhaliwyd yng Nghapel Noddfa, bnawn Gwener, 6 Mawrth. Paratowyd y gwasanaeth eleni gan chwiorydd Papua Guinea Newydd, ar y thema 'Yng Nghrist y mae aelodau lawer ond corff', a rhoddwyd yr anerchiad gan Mrs Mair Lewis.

Caniadaeth y Cysegr

Prynhawn Sul, 1 Mawrth, darlledwyd rhaglen arbennig i ddathlu pum mlynedd ar hugain er cyhoeddi Clap a Chân i Dduw gan Eddie Jones, gyda phlant Ysgol Rhydypennau yn cyflwyno ac yn canu detholiad o'r caneuon.

Oedfa Gŵyl Ddewi

Daeth cynulleidfa luosog iawn o holl eglwysi'r ofalaeth i gapel y Garn fore Sul, 1 Mawrth, i ddathlu gŵyl ein nawddsant mewn gwasanaeth arbennig. Cymerwyd rhan gan blant ac ieuenctid yr ofalaeth yn ogystal ag unigolion o'r gwahanol eglwysi. Cyflwynwyd neges Dewi gan ein Gweinidog: Byddwch lawen; cedwch eich ffydd a'ch cred, a gwnewch y pethau bychain.

Os Mêts

Cafodd y criw noson hwyliog nos Iau, 26 Chwefror, i ddathlu gŵyl ein nawddsant. I ddechrau cafwyd cawl blasus wedi'i baratoi gan Heulwen ac Aeronwy, ac yna gwis difyr dan ofal Lyn Léwis Dafis. Diolch i Dewi Hughes am ei ofal arferol gyda'r trefniadau ac i'r Gweinidog am ei gefnogaeth.

Lluniau John Thomas

Daeth Iwan Meical Jones i'r Gymdeithas, nos Wener, 20 Chwefror, i ddangos rhai o luniau'r ffotograffydd arloesol hwn o Gellan, Ceredigion, yn wreiddiol. Rhyfeddwyd at ddawn John Thomas i greu delweddau cofiadwy o gymeriadau'r cyfnod, a gyflwynwyd mor ddifyr gan Iwan.

Llongyfarchiadau

i Manon a Gwion ar enedigaeth mab bach, Ianto Jac James, ar 6 Chwefror, ac i Wynne a Linda am ddod yn dad-cu a mam-gu am y tro cyntaf. Pob dymuniad da i chi fel teulu.

Cwrdd Chwiorydd y Garn

Pnawn Mercher, 4 Chwefror, cafwyd cyfarfod difyr iawn yng nghwmni'r Athro Gruffydd Aled Williams. Testun ei sgwrs oedd yr athrylith Siôn Dafydd Rhys.

Cymdeithas Lenyddol y Garn

Nos Wener, 16 Ionawr 2009, cafwyd noson arbennig yng nghwmni dau brifardd lleol, sef Dafydd John Pritchard a Huw Meirion. Pleser oedd gwrando ar y ddau fardd dawnus yn darllen detholiad amrywiol o'u cerddi, ac yn esbonio cefndir eu gwaith.

Stampiau a chardiau Nadolig

Diolch i bawb a gyfrannodd stampiau wedi'u torri oddi ar amlenni (i Oxfam), a chardiau Nadolig (i sefydliad Coed Cadw). Aeth Mr Eddie Jones â thua dwy fil ar bymtheg o stampiau i Oxfam, a throsglwyddwyd nifer sylweddol o gardiau i Goed Cadw.

Gwasanaeth Nadolig 2008

Cynhaliwyd gwasanaeth Nadolig y plant fore Sul, 14 Rhagfyr, a'i thema eleni oedd 'Pasio'r Parsel'. Wrth i aelodau'r gynulleidfa dynnu'r haenau o bapur oddi ar y parsel i ddatgelu Ffurflen Cyfrifiad, Angel, Seren, Gwellt, Baban a Chroes, cyflwynodd plant yr ysgol Sul stori'r geni mewn modd newydd a gwahanol.

Bore Sul, 21 Rhagfyr, cynhaliwyd gwasanaeth Y Garol a'r Gair, dan arweiniad ein Gweinidog. Cymerwyd rhan gan nifer o'r aelodau mewn darlleniadau a gweddïau, a chafwyd eitemau gan Barti Cymysg y Garn, dan arweiniad Alan Wynne Jones. Cyfeiliwyd ar yr organ gan Llio Penri, ac aelodau'r band pres oedd Iwan, Rhun, Gwern, Iestyn a Ffion.

Bore'r Nadolig cynhaliwyd Gwasanaeth y Cymun am 9 o'r gloch dan arweiniad y Gweinidog. Hyfryd oedd cael cwmni nifer o 'blant' yr Eglwys oedd wedi dod adref i dreulio'r Nadolig gyda'u teuluoedd.

Llongyfarchiadau i Sioned a Manos

ar enedigaeth mab bach, Iago, brawd i Harri.

Tystysgrif Cymdeithas Achub y Plant

Yn ystod cyfarfod o'r Gymdeithas Lenyddol, nos Wener, 21 Tachwedd, cyflwynodd Kate Crockett dystysgrif i'r Grŵp Help Llaw am eu cyfraniad yn gweu 345 o hetiau babanod yn yr ymgyrch 'Gall eich het achub bywyd'.

Caniadaeth y Cysegr

Pnawn Sul, 16 Tachwedd, darlledwyd rhaglen arbennig o Gapel y Garn i nodi canmlwyddiant geni'r cyfansoddwr emyndonau William Llewelyn Edwards, a oedd yn aelod yn y Garn. Cyflwynwyd yr emynau gan y Parch. Elwyn Pryse, cafwyd teyrnged fer gan Gaenor Hall, canwyd unawd gan Marianne Jones Powell, a deuawd gan Rhun a Gwern Penri. Yr arweinydd oedd Alan Wynne Jones a'r organydd oedd Brenda Williams. Cofiwch fod modd gwrando ar y rhaglen am gyfnod cyfyngedig drwy wefan BBC Radio Cymru.

Operation Christmas Child

Dymuna'r Grŵp Help Llaw ddiolch i bawb am eu cyfraniad i'w hymgyrch ddiweddaraf. Trosglwyddwyd 54 bocs o anrhegion ynghyd â bron i £300, gan gynnwys cyfraniad ariannol o wasanaeth diolchgarwch plant yr ysgol Sul.

Cwis Golau ar y Gair

Nos Lun, 27 Hydref 2008, cynhaliwyd cwis hwyliog i blant ysgolion Sul y cylch gyda Glyn Saunders Jones yn gwisfeistr. Bu'n ornest agos iawn rhwng tîm y merched a thîm y bechgyn, ac fe gafwyd ymateb brwd i'r cwestiynau amrywiol ar gymeriadau a storïau'r Beibl ar y sgrin fawr.

Gwasanaeth Diolchgarwch plant yr ysgol Sul

Cynhaliwyd oedfa deuluol bore Sul, 19 Hydref, a chymerwyd gan blant, rhieini ac athrawon yr ysgol Sul. Lluniwyd y gwasanaeth gan ein Gweinidog ac fe gyflwynodd neges arbennig yn seiliedig ar Ddameg yr Heuwr. Roedd y casgliad tuag at Operation Christmas Child.

Cymdeithas Lenyddol y Garn

Cafwyd noson agoriadol gofiadwy iawn i flwyddyn arall yn hanes y gymdeithas nos Wener, 17 Hydref 2008, gyda darlith wych gan Arglwydd Elystan-Morgan. Ei destun oedd 'Ambell Atgof Gwleidyddol' ac fe rannodd sawl perl gyda'r gynulleidfa niferus oedd yn y festri.

Os Mêts

Roedd y festri'n llawn bwrlwm ieuenctid nos Iau, 16 Hydref, pan fu aelodau clwb Os Mêts yn mwynhau swper cynhaeaf. Y gŵr gwadd oedd Aled Myrddin, a Mrs Vera Lloyd a'i thîm oedd yn gyfrifol am baratoi'r wledd.

Caniadaeth y Cysegr

Dydd Mawrth, 14 Hydref, bu cwmni Andante yn recordio rhaglen arbennig i ddathlu 25 mlwyddiant cyhoeddi Clap a Chân i Dduw (Eddie Jones) a chofio chanmlwyddiant geni'r cerddor W. Llewelyn Edwards. Yn ystod y prynhawn, canwyd nifer o ganeuon o Glap a Chân gan rai o ddisgyblion Ysgol Rhydypennau a chanwyd emyndonau W. Llewelyn Edwards gyda'r hwyr, dan arweiniad Alan Wynne Jones.

Llongyfarchiadau

i Vernon a Dilys Jones ar enedigaeth ŵyr, Rhys Ceiro, ar 18 Medi, mab bach Osian a Bethan, a brawd i Gruff ac Ifan. Pob dymuniad da i chi fel teulu.

Cydymdeimlwn yn ddwys

â theulu'r diweddar Mr E J Morgan, Perthog, a fu farw ddydd Sul, 14 Medi, a hefyd â theulu'r diweddar Mr Geraint Morgan, Pwllglas, a fu farw ddydd Llun, 15 Medi.

Oedfa arbennig

Nos Sul, 7 Medi, cafwyd oedfa arbennig dan arweiniad ein Gweinidog, y Parch Wyn Morris. Yn bresennol yn yr oedfa yr oedd y Parch Ddr P L Lianzuala o Aizawl, Mizoram, sydd ar ymweliad â Chymru yn ymchwilio i hanes y cenhadon cyntaf a aeth o Gymru i Mizoram. Braint oedd gwrando arno'n sôn am weithgaredd yr eglwys Gristnogol ym Mizoram; roeddent yn cynorthwyo rhai anghenus oedd yn dioddef o newyn yn lleol ac yn Burma, yn ogystal ag anfon cenhadon allan i wledydd megis China a Thailand. Cyfeiriodd hefyd at yr erlid sy'n digwydd i Gristnogion mewn rhai rhannau o'r wlad, a gofynnnodd am ein gweddïau ar eu rhan. I ddiweddu'r oedfa, cyflwynodd weddi daer yn yr iaith Mizo y bydd i Gymru hithau brofi adfywiad tebyg i'r hyn a gafwyd yn ei wlad yntau.

Llongyfarchiadau calonnog

i Vernon Jones ar ennill cadair Eisteddfod Rhys Thomas James, Llanbedr Pont Steffan.

Llongyfarchiadau a phob dymuniad da

i Elfyn ac Anna, ac i Richard a Lynwen, a briodwyd yn ystod mis Awst;

i Osian Penri ar ei lwyddiant yn ei arholiadau Lefel A, a phob dymuniad da iddo yn y Coleg Meddygol yng Nghaerdydd.

Cydymdeimlwn

yn ddwys ag Eddie Jenkins a'r teulu ar farwolaeth ei frawd Tom o Temple Bar ddiwedd Gorffennaf.

Bedydd

Bore Sul, 20 Gorffennaf, bedyddiwyd Llio Tanat, merch fach Rhodri a Cet Morgan, a chwaer Rhys ac Elain, gan y Gweinidog. Hefyd, estynnwyd croeso cynnes i Rhodri a Cet yn aelodau yn y Garn. Dymunwn bob bendith i chi fel teulu.

Barbeciw'r Garn

Nos Wener, 18 Gorffennaf, er gwaethaf y tywydd anffurfiol, daeth tyrfa dda ynghyd i ysgoldy Bethlehem, Llandre, i fwynhau'r barbeciw blynyddol. Roedd gwledd wedi'i darparu ar ein cyfer gan Dwysli a'i thîm a mwynhawyd noson ddifyr o gymdeithasu. Diolch i bawb am gefnogi. Lluniau yn yr oriel

Llongyfarchiadau

i Osian Penri ar ddathlu ei ben-blwydd yn 18 oed ar 14 Gorffennaf;

i Lowri ac Owain ar eu priodas yng nghapel y Garn ddydd Sadwrn, 5 Gorffennaf, a phob dymuniad da i chi yn y dyfodol;

i Seiriol ar ennill gradd mewn Hanes o Brifysgol Caergrawnt, a phob dymuniad da iddo yn ei swydd newydd gyda chwmni Rondo yng Nghaernarfon.

Gŵyl yr Ysgolion Sul

Cynhaliwyd yr ŵyl eleni bnawn Sul, 29 Mehefin, yn ysgol Llanfarian. Y gŵr gwadd oedd Ifan Gruffydd, Tregaron, a mwynhaodd y plant weithgareddau amrywiol, yn cynnwys celf, cerddoriaeth a chwaraeon. Derbyniodd yr ysgol Sul dystysgrif gweithgaredd am ei gwaith yn ystod y flwyddyn.

Dymuniadau gorau

am adferiad llwyr a buan i'n cyn-weinidog, Y Parchedig R W Jones, a fu'n cael triniaeth yn yr ysbyty. Anfonwn ein cofion cynhesaf atoch chi a Mrs Rhian Jones.

Oedfa Cymorth Cristnogol

Cynhaliwyd oedfa deulol arbennig dan arweiniad y Gweinidog bore Sul, 18 Mai, ar y thema Trawsnewidwyr. Yn dilyn yr oedfa, cafwyd Cinio Bara a Chaws tuag at Apêl Cymorth Cristnogol, wedi'i drefnu gan y Chwiorydd.

Y Gymanfa Ganu

Cynhaliwyd oedfa deuluol fore Sul y Pentecost, 11 Mai 2008 yng Nghapel y Morfa, Aberystwyth. Cymerwyd rhan gan aelodau ysgolion Sul Gogledd Ceredigion a'r gŵr gwadd oedd Martyn Geraint. Arweiniwyd cymanfa'r oedolion yn yr hwyr gan Alan Wynne Jones, ac fe gafwyd canu mawl ac addoliad effeithiol dan ei arweiniad.

Os Mêts

Bu'r aelodau'n gwneud gwaith dyngarol trwy gasglu arian mân fel rhan o ymgyrch Oxfam i brynu geifr i deuluoedd tlawd yn Affrica. Llwyddwyd i godi £250 hyd yma - felly bydd 10 o deuluoedd yn elwa o'r ymdrechion hyn. Diolch i bawb am eu cyfraniadau a'u cefnogaeth, ac yn arbennig i Mrs Vera Lloyd am ei gweledigaeth a'i harweiniad.

Y Groglith a'r Pasg

I gofio a dathlu'r Pasg eleni, cynhaliwyd dwy oedfa gymun - ar fore'r Groglith ac ar fore Sul y Pasg - dan arweiniad y Bugail. Yn ei neges ar fore'r Groglith pwysleisiodd fod y goleuni yn drech na'r tywyllwch, ac ar fore Sul y Pasg, ei anogaeth oedd y byddai'r geiriau a ddefnyddiwyd i ddisgrifio profiad Ioan wrth iddo wynebu'r bedd gwag, sef 'Gwelodd ac fe gredodd', yn dod yn brofiad real a byw i ni heddiw.

Llongyfarchiadau calonnog

i Ann ac Alan Wynne Jones ar ddod yn daid a nain am y tro cyntaf. Ganed merch fach, Ffion, i Gethin a Gwen ddydd Iau, 20 Mawrth, a dymunwn bob bendith i'r teulu bach.

Bwyd i Bosnia

Dymuna'r Grŵp Help Llaw ddiolch i bawb a ddaeth i festri'r Garn fore Sadwrn, 15 Mawrth, gyda chyfraniadau, yn nwyddau ac arian, i lenwi tryc Eric Harries a fydd yn mynd ar daith i Mostar, Bosnia yn fuan.

Y Gymdeithas Lenyddol

Daeth tymor y gymdeithas i ben am eleni gyda noson arbennig iawn gan Beti Griffiths, Llanilar, gyda chymorth ei brawd Isaac a'i ffrind Eirwen Hughes, nos Wener, 14 Mawrth. Mewn cyfuniad o'r llon a'r lleddf, cafwyd cyflwyniadau effeithiol ganddynt o neges Dewi Sant - i fod yn llawen, cadw'r ffydd a gwneud y pethau bychain - mewn noson a fydd yn aros yn y cof am amser maith.

Oedfa Gŵyl Ddewi Plant yr Ofalaeth

Bore Sul, 2 Mawrth, daeth cynulleidfa gref ynghyd i ddathlu gŵyl ein nawddsant mewn gwasanaeth arbennig dan arweiniad ein Gweinidog. Cymerwyd rhan flaenllaw gan y plant, a'r llefarwyr oedd Carwen Hughes-Jones, Nia Peris ac Elfyn Lloyd Jones.

Os Mêts...

Nos Fercher, 27 Chwefror, i ddathlu Gŵyl Ddewi cafwyd noson Gawl a Chwis yn Festri'r Garn. Y cwisfeistr medrus oedd Lyn Lewis Dafis.

Cydymdeimlwn

â Mrs Ann Jones, Llys Maelgwn, a'r teulu yn eu profedigaeth o golli mam a nain annwyl, sef Mrs Alwen Williams, gynt o Ben-y-wern, a hithau wedi cyrraedd yr oedran teg o 101 oed.

Colli gweithiwr ieuenctid

Gyda gofid a thristwch y derbyniwyd y newydd am farwolaeth ddisymwyth Sion Ifan Evans, Gweithiwr Ieuenctid yng Ngholeg y Bala, fore Sadwrn, 8 Chwefror. Bu Sion yn eithriadol o gefnogol i'n hymdrechion i sefydlu gweithgaredd 'Os Mêts' i ieuenctid yr ardal, a gwelir ei golli'n fawr. Estynnwn ein cydymdeimlad dwysaf â'i deulu, ei ffrindiau a'i gyd-weithwyr. Er parch i'w goffadwriaeth, gohiriwyd cyfarfod 'Os Mêts' a oedd i'w gynnal nos Fercher, 13 Chwefror.

Gweinidogaethu ym Mhatagonia

Yng Nghyfarfod y Chwiorydd bnawn Mercher, 6 Chwefror 2008, cafwyd cyfle i glywed profiadau'r Parch W J a Mrs Gwenda Edwards ym Mhatagonia, lle bu WJ yn gweinidogaethu am dri mis ddiwedd 2007.

Os Mêts...

Canolfan Hamdden Clarach oedd man cyfarfod y criw nos Fercher, 29 Ionawr, ac fe gafwyd noson ddifyr yn mwynhau gêm o Fowlio Deg.

Dathlu'r Plygain

Nos Wener, 18 Ionawr, cafwyd noson arbennig yn y Gymdeithas Lenyddol yng nghwmni'r Dr Rhiannon Ifans a Pharti Plygain Penrhyn-coch.

Cwrdd Gweddi Dechrau'r Flwddwyn

Cynhaliwyd y cyfarfod gweddi blynyddol nos Wener, 11 Ionawr, a chymerwyd rhan gan Eddie Jenkins, Vernon Jones, Bryn Lloyd, Elystan Morgan a Dewi Hughes. Rhoddwyd y fendith gan y Gweinidog, a'r cyfeilydd oedd Vera Lloyd.

Cartref Tregerddan

Brynhawn Sul, Ionawr 7fed, cynhaliwyd gwasanaeth yng Nghartref Tregerddan dan ofal Alan Wynne Jones. Canwyd carolau gan y Côr Unedig, gyda Llio Penri yn cyfeilio, darllenodd Gwenda Edwards a Hywel Roberts, a rhoddodd Alan Wynne Jones anerchiad ar yr Hen Galan.