Archif newyddion Capel y Garn 2007-8

Am deyrngedau er cof am rai o aelodau'r Garn, cliciwch yma.

Am archif newyddion 2006, cliciwch yma.

Llongyfarchiadau calonnog

i Ann ac Alan Wynne Jones ar ddod yn daid a nain am y tro cyntaf. Ganed merch fach, Ffion, i Gethin a Gwen ddydd Iau, 20 Mawrth, a dymunwn bob bendith i'r teulu bach.

Bwyd i Bosnia

Dymuna'r Grŵp Help Llaw ddiolch i bawb a ddaeth i festri'r Garn fore Sadwrn, 15 Mawrth, gyda chyfraniadau, yn nwyddau ac arian, i lenwi tryc Eric Harries a fydd yn mynd ar daith i Mostar, Bosnia yn fuan.

Y Gymdeithas Lenyddol

Daeth tymor y gymdeithas i ben am eleni gyda noson arbennig iawn gan Beti Griffiths, Llanilar, gyda chymorth ei brawd Isaac a'i ffrind Eirwen Hughes, nos Wener, 14 Mawrth. Mewn cyfuniad o'r llon a'r lleddf, cafwyd cyflwyniadau effeithiol ganddynt o neges Dewi Sant - i fod yn llawen, cadw'r ffydd a gwneud y pethau bychain - mewn noson a fydd yn aros yn y cof am amser maith.

Oedfa Gŵyl Ddewi Plant yr Ofalaeth

Bore Sul, 2 Mawrth, daeth cynulleidfa gref ynghyd i ddathlu gŵyl ein nawddsant mewn gwasanaeth arbennig dan arweiniad ein Gweinidog. Cymerwyd rhan flaenllaw gan y plant, a'r llefarwyr oedd Carwen Hughes-Jones, Nia Peris ac Elfyn Lloyd Jones.

Os Mêts...

Nos Fercher, 27 Chwefror, i ddathlu Gŵyl Ddewi cafwyd noson Gawl a Chwis yn Festri'r Garn. Y cwisfeistr medrus oedd Lyn Lewis Dafis.

Cydymdeimlwn

â Mrs Ann Jones, Llys Maelgwn, a'r teulu yn eu profedigaeth o golli mam a nain annwyl, sef Mrs Alwen Williams, gynt o Ben-y-wern, a hithau wedi cyrraedd yr oedran teg o 101 oed.

Colli gweithiwr ieuenctid

Gyda gofid a thristwch y derbyniwyd y newydd am farwolaeth ddisymwyth Sion Ifan Evans, Gweithiwr Ieuenctid yng Ngholeg y Bala, fore Sadwrn, 8 Chwefror. Bu Sion yn eithriadol o gefnogol i'n hymdrechion i sefydlu gweithgaredd 'Os Mêts' i ieuenctid yr ardal, a gwelir ei golli'n fawr. Estynnwn ein cydymdeimlad dwysaf â'i deulu, ei ffrindiau a'i gyd-weithwyr. Er parch i'w goffadwriaeth, gohiriwyd cyfarfod 'Os Mêts' a oedd i'w gynnal nos Fercher, 13 Chwefror.

Gweinidogaethu ym Mhatagonia

Yng Nghyfarfod y Chwiorydd bnawn Mercher, 6 Chwefror 2008, cafwyd cyfle i glywed profiadau'r Parch W J a Mrs Gwenda Edwards ym Mhatagonia, lle bu WJ yn gweinidogaethu am dri mis ddiwedd 2007.

Os Mêts...

Canolfan Hamdden Clarach oedd man cyfarfod y criw nos Fercher, 29 Ionawr, ac fe gafwyd noson ddifyr yn mwynhau gêm o Fowlio Deg.

Dathlu'r Plygain

Nos Wener, 18 Ionawr, cafwyd noson arbennig yn y Gymdeithas Lenyddol yng nghwmni'r Dr Rhiannon Ifans a Pharti Plygain Penrhyn-coch.

Cwrdd Gweddi Dechrau'r Flwddwyn

Cynhaliwyd y cyfarfod gweddi blynyddol nos Wener, 11 Ionawr, a chymerwyd rhan gan Eddie Jenkins, Vernon Jones, Bryn Lloyd, Elystan Morgan a Dewi Hughes. Rhoddwyd y fendith gan y Gweinidog, a'r cyfeilydd oedd Vera Lloyd.

Cartref Tregerddan

Brynhawn Sul, Ionawr 7fed, cynhaliwyd gwasanaeth yng Nghartref Tregerddan dan ofal Alan Wynne Jones. Canwyd carolau gan y Côr Unedig, gyda Llio Penri yn cyfeilio, darllenodd Gwenda Edwards a Hywel Roberts, a rhoddodd Alan Wynne Jones anerchiad ar yr Hen Galan.

Gwylnos

Ganol nos y 31ain o Ragfyr cynhaliwyd gwylnos i groesawu'r Flwyddyn Newydd, ac unwaith eto braf oedd gweld aelodau o gapeli eraill yr ofalaeth ac o gapel Noddfa wedi troi i mewn. Cafwyd darlleniadau o'r Beibl a myfyrdodau gan y Bugail, Eddie Jenkis, Bryn Lloyd, Marian Beech Hughes, Gweneira Williams, a'r Parchedigion W J Edwards a Richard Lewis. Vera Lloyd oedd wrth yr organ.

Oedfa bore Nadolig

Fore dydd Nadolig am naw o'r gloch cafwyd Oedfa Gymun yn y Garn dan arweiniad y Parch Wyn Morris. Braf oedd gweld rhai o blant yr eglwys a oedd gartref dros y gwyliau, ynghyd ag aelodau o eglwysi eraill yr ofalaeth ac o Gapel Noddfa yn ymuno yn y dathlu.

Noswyl Nadolig

Mynychodd aelodau'r o'r Garn yr oedfa i groesawu'r Nadolig a gynhaliwyd yng Nghapel y Noddfa dan arweiniad y gweinidog, y Parch Richard Lewis.

Gwasanaeth Nadolig Unedig

Fore Sul, Rhagfyr 23ain, cynhaliwyd Gwasanaeth Nadolig ar y cyd i'r Garn a'r Noddfa yng Nghapel y Garn. Alun Jones oedd wedi trefnu'r darlleniadau ac Alan Wynne Jones oedd yn gyfrifol am y gerddoriaeth. Cymerodd nifer fawr o aelodau'r ddau gapel ran yn yr addoliad, ac fe ganodd y côr unedig nifer o garolau. Llio Penri oedd wrth yr organ. Cafwyd cyfeiliant hefyd gan grŵp o offerynwyr pres ifainc, sef Iwan Williams, Rhun Penri ac Iestyn Evans. Methodd Gwern Penri â bod yn bresennol oherwydd salwch.

Y Gymdeithas Lenyddol

Nos Wener, Rhagfyr 21ain, bu'r Gymdeithas Lenyddol yn cyfarfod. Mary Thomas, Dôlgelynnen oedd y wraig wadd. Treuliwyd noson ddiddorol a difyr yn ei chwmni yn clywed am ei gwaith yn olrhain achau ei thylwyth, ac yn trafod perthnasau. Gaenor Hall, Cadeirydd y Gymdeithas, oedd yn llywyddu.

Gwasanaeth Nadolig

Fore Sul, Rhagfyr 16eg, cynhaliwyd Oedfa Nadolig i'r Ofalaeth yn y Garn. Perfformiodd y plant lleiaf ddrama'r 'Bugail Blin' dan gyfarwyddyd Gweneira Williams, ac fe gafwyd darlleniadau, gweddïau, caneuon, a sgets gan y merched uwchradd a oedd wedi eu hyfforddi gan Alun Jones. Dangosodd y Gweinidog Stori'r Geni ar Powerpoint, ac fe ganodd y Côr Unedig o aelodau'r Garn a'r Noddfa, dan arweiniad Alan Wynne Jones, nifer o garolau. Brenda Williams oedd yr organydd. Hyfryd oedd gweld cynifer o blant ac ieuenctid yr Ysgol Sul yn gwneud eu gwaith mor raenus, a chynifer o bobl yn y gynulleidfa i gyfranogi o'r addoliad.

Parti Nadolig yr ysgol Sul

Cynhaliwyd y parti bnawn Sadwrn, 15 Rhagfyr, yn festri'r Garn. Yn dilyn te blasus, cafodd y plant hwyl fawr yn chwarae'r gemau roedd Joyce Bowen wedi eu paratoi ar eu cyfer. Galwodd Siôn Corn draw hefyd gyda llond sach o anrhegion. Diolch i Janet Roberts am drefnu'r cyfan ac i Gwynant Evans am helpu Santa.

Trip Nadolig Os Mêts ...

Nos Fercher, 12 Rhagfyr, aeth criw 'Os Mêts' i lawr i Theatr Felin-fach i weld y pantomeim blynyddol. Yn ôl y disgwyl, fe gafwyd noson werth chweil, gyda phawb yn mwynhau noson hwyliog. Diolch i Dewi am drefnu.

Oedfa fedydd

Bore Sul, 9 Rhagfyr, mewn gwasanaeth arbennig dan arweiniad ein Gweinidog, y Parch Wyn Morris, bedyddiwyd Lois Medi, merch ferch Chris a Carwen, a Ffion Mari, merch fach Andrew a Manon. Cyflwynwn ddymuniadau gorau'r eglwys i'r ddau deulu.

Cydymdeimlwn

yn ddwys iawn â theulu'r diweddar Rhys Davies, Nant Gwyn, Dolau, a fu farw'n ddisymwth, ddydd Sul, 2 Rhagfyr. Cynhaliwyd y gwasanaeth angladd, dan ofal ei Weinidog, yng Nghapel y Garn, ddydd Sadwrn, 8 Rhagfyr. Meddyliwn yn arbennig am ei fam, Mrs Nest Davies, ac am weddill y teulu yn eu profedigaeth drist.

Oedfa'r Bore

Y Parchedigion Wyn a Judith Morris oedd yn arwain oedfa'r bore a ddarlledwyd ar Radio Cymru fore Sul, 25 Tachwedd, ar Radio Cymru. Eu thema oedd 'Y Môr a'r Mynydd', a chymerwyd rhan hefyd gan Gôr Cantre'r Gwaelod.

Ffair Nadolig y Garn

Cynhaliwyd y ffair flynyddol, dan ofal y Chwiorydd, fore Sadwrn, 24 Tachwedd, yn Neuadd Rhydypennau. Erddyn a Gwenda James agorodd y ffair eleni, a chyflwynwyd blodau i Gwenda gan Owen. Er gwaetha'r tywydd anffafriol, cafwyd ffair lwyddiannus - diolch i bawb am eu cefnogaeth a'u cyfraniadau.

Operation Christmas Child

Dymuna'r Grŵp Help Llaw ddiolch i bawb a gefnogodd ymgyrch hon eto eleni, a diolch yn arbennig i Eddie a Bethan Jones am drefnu. Anfonwyd dros ddeugain o focsys i'r ymgyrch, yn ogystal â £135 o nawdd.

Apêl Sierra Leone

Cynhaliwyd Bore Coffi dan ofal y Blaenoriaid tuag at yr apêl bore Sadwrn, 27 Hydref, yn y festri. Diolch i bawb am eu cefnogaeth a hefyd i'r aelodau hynny a gyfrannodd trwy gyfrwng yr amlenni arbennig. Trosglwyddwyd swm o £1,300 – heb gynnwys yr ad-daliadau Cymorth Rhodd – i gronfa'r apêl.

Cyfarfod Diolchgarwch

Cynhaliwyd oedfa ddiolchgarwch y Garn dan arweiniad y Gweinidog, Y Parchedig Wyn Morris, fore Sul, 21 Hydref. Cymerwyd rhan gan blant ac ieuenctid yr ysgol Sul a chafwyd anerchiad arbennig gan y Gweinidog. Pleser hefyd oedd cael cwmni cyfeillion o Gapel Noddfa.

Llongyfarchiadau calonnog

a dymuniadau gorau'r Eglwys i Eddie a Bethan Jones, a ddathlodd eu priodas aur ar 19 Hydref.

Cydymdeimlwn

yn ddwys iawn â Mrs Menna James yn ei phrofedigaeth o golli ei gŵr, Mr Ifor James, a hefyd â Mrs Bet Evans a'r teulu yn eu profedigaeth o golli ei brawd.

'Os Mêts ...'

Cynhaliwyd noson i lansio gweithgareddau'r clwb ieuenctid i bobl ifanc 11+ oed, nos Fercher, 10 Hydref, yn festri'r Garn, yng nghwmni Siôn Evans o Goleg y Bala.

Oedfa deuluol

Bore Sul, 23 Medi, cynhaliwyd oedfa deuluol, ar thema 'Porthi'r Pum Mil', dan arweiniad y Gweinidog, y Parch Wyn Morris. Cymerwyd rhan gan blant ac ieuenctid yr ysgol Sul, a chafwyd gair gan y Gweinidog, gyda chymorth cyflwyniad Powerpoint, yn dangos neges ac arwyddocâd y wyrth hon.

Cyfarfod Chwiorydd Henaduriaeth Gogledd Aberteifi

Prynhawn Sadwrn, 22 Medi, cafwyd sgwrs ddifyr gan Mrs Ina Tudno Williams am ei thaith ddiweddar i India gyda'i gŵr, Y Parchedig Athro John Tudno Williams. Tra oeddynt yno, dadorchuddiwyd cofeb i Thomas Jones, y cenhadwr cyntaf i Fryniau Casia, gan y Parchg John Tudno Williams.

Llongyfarchiadau calonnog

i'r Parchedig W J Edwards, y mae ei wreiddiau'n ddwfn yng Nghapel y Garn, ar gyflawni 40 mlynedd yn y weinidogaeth. Cynhaliwyd gwasanaeth arbennig yn Llanuwchllyn ddydd Sul, 2 Medi 2007, i ddathlu ac i ddiolch am ei weinidogaeth.

Dymuniadau gorau'r eglwys hefyd iddo ef a Gwenda ar eu hymweliad â Phatagonia, lle bydd W J yn gweinidogaethu am y tri mis nesaf.

Llongyfarchiadau

i Manon Wyn a Gwion ar eu priodas yng Nghapel y Garn, ddydd Sadwrn, 1 Medi 2007. Pob hapusrwydd i chi eich dau yn y dyfodol.

Dymuniadau gorau

i Dewi Hughes ar ei ymddeoliad o'i swydd fel Cyfarwyddwr Cynorthwyol yn Adran Addysg Ceredigion ddiwedd mis Awst. Gobeithio y cei fwynhau seibiant haeddiannol, Dewi!

Llongyfarchiadau calonnog iawn

i Vernon Jones ar ei lwyddiant yn ennill y wobr gyntaf am hir a thoddiad ar y testun 'Clawdd' yn Eisteddfod Genedlaethol Sir Fflint a'r Cyffiniau.

Caethwasiaeth ddoe a heddiw

Mewn gwasanaeth arbennig a drefnwyd gan ein Gweinidog, bore Sul, 29 Gorffennaf, cafwyd cyfle i fyfyrio ar erchyllterau'r fasnach gaethweision a'r ymdrechion a wnaed i'w dileu. Cyfeiriwyd yn arbennig at ddeddf Diddymu Caethwasiaeth 1807 a hefyd at gyfraniad Martin Luther King i'r ymgyrch dros hawliau i bobl groenddu. I gloi, fe'n hatgoffwyd o'r ffaith - er gwaethaf yr holl ymdrechion hyn - fod llawer o bobl yn parhau i fod yn 'gaeth' heddiw.

Am ragor o wybodaeth am ymgyrch arbennig i ddileu'r fasnach ddynol yn Albania, cliciwch yma.

Bedydd

Bore Sul, 15 Gorffennaf, bedyddiwyd Gerwyn Thomas Jones, mab bach Alun a Siân a brawd William, Caergywydd, gan ein Gweinidog, y Parch Wyn Morris. Dymunwn bob bendith i chi fel teulu.

Trip yr ysgol Sul

Dydd Sadwrn, 14 Gorffennaf, teithiodd y plant, eu rhieni, athrawon yr ysgol Sul a chyfeillion i Gaer i ymweld â'r Sŵ. Braf oedd cael cwmni'r gweinidog, y Parch Wyn Morris, a'r Barchedig Judith Morris hefyd. Cafwyd diwrnod gwych ac roedd blas arbennig ar y sglodion yn y Trallwm ar y ffordd adre. Diolch i Lowri am drefnu.

Gwasanaeth Ordeinio a Sefydlu

Dymuniadau gorau a phob bendith i'r Barchedig Judith Morris, a ordeiniwyd ac a sefydlwyd yn weinidog ar Eglwysi Bethel, Aberystwyth, a Horeb, Penrhyn-coch, mewn gwasanaeth a gynhaliwyd yng Nghapel Bethel, Aberystwyth, bnawn Sadwrn, 7 Gorffennaf.

Llongyfarchiadau

i Catrin Thomas a Phil ar eu priodas yng Nghapel y Garn, ddydd Sadwrn, 7 Gorffennaf. Pob dymuniad da i chi yn y dyfodol. Llun yn yr oriel.

Barbeciw'r Garn

Daeth tyrfa dda i Fethlehem, Llandre, nos Wener, 6 Gorffennaf i fwynhau'r barbeciw blynyddol - diolch i'r pwyllgor gweithgar dan arweiniad Alan Wynne Jones am drefnu noson ddifyr o gymdeithasu, ac yn arbennig i Dwysli Peleg-Williams a'i chriw am baratoi'r wledd. Lluniau yn yr oriel.

Gwasanaeth Sefydlu'r Parchedig Wyn Rhys Morris

Nos Wener, 25 Mai, roedd Capel y Garn yn gyffyrddus lawn, gyda nifer fawr wedi teithio o ofalaeth Llanfynydd i ymuno gydag aelodau'r ofalaeth a chyfeillion o eglwysi eraill ar gyfer y gwasanaeth arbennig hwn. Llywyddwyd gan y Parchedig Pryderi Llwyd Jones, a chymerwyd rhan gan aelodau eglwysi'r ofalaeth a nifer o weinidogion a chyfeillion; rhoddwyd siars i'r eglwysi gan y Parchedig Eric Greene.

Am gopi o'r rhaglen, cliciwch yma

Am adroddiad o'r gwasanaeth, portread o'r Parchedig Wyn Morris a siars y Parchedig Eric Greene i eglwysi'r ofalaeth, cliciwch yma.

Am luniau o'r achlysur, ewch i'r oriel.

Cenhadu yn Cumbria

Ddechrau Mai eleni, treuliodd ein gweinidog, y Parchedig Wyn Morris, wythnos ym mhentref Ambleside, Cumbria, fel rhan o ymgyrch genhadu 'Through Faith Missions'. Am adroddiad o'i brofiadau yn ystod yr ymgyrch, cliciwch yma.

Ymweliad â Bryniau Khasia

Ddiwedd Ionawr 2007, bu'r Parchedig Wyn Morris a Mrs Judith Morris ar ymweliad ag Eglwys Bresbyteraidd India ar Fryniau Khasia. Am adroddiad o'u taith, cliciwch yma.

Llongyfarchiadau

i Alun Jones, Gwyddfor, ar gael ei anrhydeddu â'r wisg wen yn yr Orsedd yn yr Eisteddfod Genedlaethol, Awst 2007.

'Os mêts ...'

Daeth tymor presennol y clwb ieuenctid i ben nos Fercher, 23 Mai, gyda chwaraeron a barbeciw yn Ynys-las. Diolch i Glyn Saunders Jones a Dewi Hughes am drefnu, ac i'r ieuenctid a'u rhieni am eu cefnogaeth.

Oedfa Cymorth Cristnogol

Bore Sul, 20 Mai, daeth eglwysi'r ofalaeth a Chapel Noddfa at ei gilydd dan arweiniad ein Gweinidog ar gyfer oedfa arbennig i nodi diwedd wythnos Cymorth Cristnogol. Yn dilyn yr oedfa, cafwyd cinio bara a chaws er budd Cymorth Cristnogol. Lluniau yn yr oriel.

Cymanfa Ganu Unedig Gogledd Ceredigion

Cynhaliwyd y gymanfa eleni ddydd Sul, 13 Mai, yng nghapel Bethel, Tal-y-bont. Cafwyd oedfa deuluol yn y bore ar y thema 'Ffrindiau', a chymerwyd rhan gan blant ac ieuenctid yr ysgolion Sul. Y gŵr gwadd oedd Ifan Gruffydd, Tregaron, ac fe gafwyd gair pwrpasol ganddo. Arweiniwyd cymanfa'r oedolion yn yr hwyr gan Alan Wynne Jones, ac fe gafwyd oedfa fendithiol iawn o ganu mawl dan ei arweiniad.

Bedydd Lleucu Siôn

Bore Sul, 22 Ebrill, bedyddiwyd Lleucu Siôn, merch fach Geraint a Nia, gan ein Gweinidog. Croeso cynnes iddi hi a'i rhieni yn aelodau o deulu'r Eglwys yn y Garn.

Pwyllgor Cenhadol y Chwiorydd, Henaduriaeth Gogledd Aberteifi

Cynhaliwyd y Pwyllgor Blynyddol bnawn Sadwrn, 21 Ebrill 2007, yn y Garn. Llywyddwyd gan Miss Beti Griffiths, a'r siaradwr gwadd oedd Aneurin Owen, Llansannan, a soniodd am ei daith i Mizoram, India, fis Tachwedd 2006 fel rhan o'r tîm cynghori ar atal HIV/Aids yn y dalaith. I ddarllen mwy am y cynllun, cliciwch yma

Croesawu Gweinidog newydd

Llawenydd mawr i aelodau'r eglwys yw croesawu'r Parchedig Wyn Rhys Morris yn weinidog ar Ofalaeth y Garn. Dymunwn bob bendith iddo ef a'i briod, Mrs Judith Morris, gweinidog newydd Gofalaeth Bedyddwyr Gogledd Ceredigion. Dechreuodd y Parch Wyn Morris ar ei weinidogaeth yn y Garn gydag oedfa gymun fore'r Groglith ac oedfa gymun i'r ofalaeth fore Sul y Pasg. Calondid oedd gweld y gynulleidfa niferus a ddaeth ynghyd o'r gwahanol gapeli i ddathlu'r ŵyl gyda'n gilydd ar yr achlysur hapus hwn.

Bwyd i Bosnia

Dymuna'r Grŵp Help Llaw ddiolch i bawb a ddaeth i festri'r Garn fore Sadwrn, 31 Mawrth 2007, i gyflwyno rhoddion tuag at daith Eric Harries i Bosnia. I ddarllen mwy am yr apêl, cliciwch yma.

Cydymdeimlwn

yn ddwys iawn â theulu'r ddiweddar Mrs Eirlys Melville Jones, a fu farw ddydd Sul, 25 Mawrth. Cofiwn amdani fel gwraig liwgar a hwyliog, a fu'n arbennig o ffyddlon yn y Garn ac yn enwedig yn ysgoldy Bethlehem. I ddarllen teyrnged y Parchedig Pryderi Llwyd Jones i Mrs Melville Jones, cliciwch yma

Os Mêts ...!

Cynhaliwyd noson gyntaf Clwb Ieuenctid Cristnogol newydd ar gyfer Blynyddoedd 7-11 nos Wener, 16 Mawrth, gydag ymweliad â Theatr y Celfyddydau, Aberystwyth i fwynhau perfformiad o'r ddrama gerdd newydd 'Hello Dolly'. Am fanylion cyfarfodydd Ebrill a Mai, ewch i'r dyddiadur

Dileu caethwasiaeth

Ddydd Sul, 25 Mawrth, cofiwyd am ddaucanmlwyddiant pasio'r Ddeddf Seneddol i ddileu caethwasiaeth a chyfraniad arloesol William Wilberforce i'r ymgyrch. I ddarllen rhagor am y digwyddiad hanesyddol hwn, ewch i Adran Grefydd safle BBC Cymru, drwy glicio yma

I ddarllen cyfieithiad Dafydd Owen o 'Amazing Grace', emyn enwog John Newton sy'n ymwneud â dileu caethwasiaeth, ewch i dudalen myfyrdodau

'Credu Heddiw'

Nos Fawrth, 20 Mawrth, cafwyd yr olaf mewn cyfres o sgyrsiau gan Iolo Lewis, Aberystwyth, ar y testun 'Beth yn rhesymol y gellir ei gredu heddiw?' - cyfres nodedig a ysgogodd sawl trafodaeth frwd ac a gododd nifer o gwestiynau dyrys ac amserol. Rydym yn ddiolchgar iawn i Iolo Lewis am gyflwyno'r sgyrsiau hyn. Lluniau yn yr oriel

Atgofion Amser Rhyfel

Lansiwyd y gyfrol hon, sy'n cynnwys atgofion pump aelod o Gapel y Garn yn ystod yr Ail Ryfel Byd, mewn cyfarfod o'r Gymdeithas Lenyddol a gynhaliwyd nos Wener, 16 Mawrth 2007. Mae copïau ar werth am £3. Am ragor o fanylion, cliciwch yma.

Perfformiad gwefreiddiol

- dyna farn y criw mawr a deithiodd i lawr i Theatr Felin-fach nos Iau, 15 Mawrth, i weld cynhyrchiad Cwmni Broydd Tywi o'r pasiant 'Jwdas' gan Nan Lewis. I ddarllen mwy am y cynhyrchiad, cliciwch yma

Cymdeimlwn

yn ddwys iawn â Bethan, Lowri ac Ifan yn eu profedigaeth o golli mam a nain annwyl, sef Mrs Margaret Roberts, Dinbych, a fu farw'n dawel ar 15 Mawrth.

Llongyfarchiadau

i Charlotte am ennill y gadair yn eisteddfod ysgol Rhydypennau, ac i Meinir am ddod yn ail yn yr un gystadleuaeth. Mae'r ddwy ymysg selogion pennaf yr ysgol Sul. Daliwch ati!

i Manon ac Andrew Curley ar enedigaeth merch, Ffion Mari, ar 5 Chwefror - wyres i Dan a Sandra Mason a gor-wyres i Eirlys Owen.

Dydd Gweddi Byd-eang y Chwiorydd

Cynhaliwyd cwrdd gweddi yn y Garn nos Wener, 2 Mawrth 2007, pryd y cymerwyd rhan gan chwiorydd Eglwys Llanfihangel Genau'r-glyn, Noddfa a'r Garn. Rhoddwyd yr anerchiad gan Mrs Llinos Dafis. I ddarllen rhagor am y diwrnod a'r gwasanaeth arbennig hwn, a luniwyd eleni gan ferched Paraguay, cliciwch yma.

Cymorth i Lithuania

Dymuna'r Grŵp Help Llaw ddiolch i bawb am y rhoddion a dderbyniwyd erbyn diwedd Chwefror 2007 mewn ymateb i apêl a dderbyniwyd o'r cwfaint yn Pastuva i helpu dau deulu anghenus yn Lithuania.

Llongyfarchiadau

calonnog iawn i Vernon a Dilys Jones ar enedigaeth ŵyr bach, Ifan Ceiro, mab i Osian a Bethan, a brawd bach i Gruff, ar 9 Ionawr. Dymuniadau gorau i chi fel teulu.