Gweithgareddau'r Capel

Yn ychwanegol at y gwasanaethau a gynhelir yn y capel bob Sul, mae nifer o weithgareddau eraill yn cael eu cynnal yma.
Dyma rai ohonyn nhw.

Grŵp Help Llaw

Mae'r Grŵp Help Llaw yn cyfarfod am 2.30 o'r gloch bob prynhawn Mercher, ac eithrio'r prynhawn Mercher cyntaf yn y mis a thymor y gwyliau.

Gallwch droi i mewn am gwmni a mwynhau paned a sgwrs, ac os dymunwch hynny, gallwch ymuno mewn gweithgareddau i estyn llaw i'r anghenus, e.e. gwau i Lithuania, casglu bwyd i Bosnia, a pharatoi bocsys Operation Christmas Child, i enwi rhai. Rydym yn cofio hefyd am elusennau yng Nghymru ac achosion lleol.

Mae'r gwahoddiad yn agored i bawb, croeso cynnes i chi.

Shân Hayward
Ysgrifennydd
(01970 828268)

Cymdeithas y Chwiorydd

Mae chwiorydd y Garn yn cyfarfod yn fisol am 2 o'r gloch ar y dydd Mercher cyntaf yn y mis o Fedi hyd Ebrill.

Nod y cyfarfod yw helpu i gynnal y gymdeithas o fewn a thu allan i'r Eglwys gyda defosiwn a siaradwr/wraig, a mwynhau sgwrs dros baned o de. Rhydd y casgliad gyfle hefyd i gyfrannu ychydig at sawl achos da.

Mae croeso i unrhyw un droi i mewn atom.

Elen Evans
Ysgrifennydd

Y Gymdeithas Lenyddol

Mae'r gymdeithas yn cwrdd yn fisol o fis Hydref hyd fis Mawrth, gan wahodd gwahanol siaradwyr i'n hannerch. Mae'r testunau'n amrywio o'r llenyddol i'r cyffredinol.

Cynhelir y cyfarfodydd ar nos Wener am 7.30 o'r gloch.

Croeso cynnes i chi ymuno gyda ni.

Mary Thomas
Ysgrifennydd
(01970 828772)

Y Gymanfa Ganu

Mae gan Gapel y Garn draddodiad cerddorol llewyrchus iawn sy'n ymestyn yn ôl i gyfnod J T Rees, un a wasanaethodd y capel am dros drigian mlynedd. Yn ystod y cyfnod hwn sefydlwyd a ffynnodd yr 'Ysgol Gân' a 'Cymanfa Ganu Dosbarth y Garn'.

Olynwyd J T Rees a Tom Jones, Felin Gyffin, gan y ddau frawd William Llewelyn ac Alfred Edwards. Ar eu hôl hwy parhawyd i hyfforddi cantorion ar gyfer y gymanfa ganu gan ddwy o ddisgyblion J T Rees: Gaenor Hall yng ngofal yr oedolion a Bethan Jones yng ngofal y plant. Yn ystod nawdegau'r ganrif ddiwethaf cynorthwywyd Gaenor a Bethan gan Alan Wynne Jones, Mair Evans a Llio James.

Yn sgil cyhoeddi Caneuon Ffydd penderfynwyd cael un detholiad cyffredin ar gyfer cymanfaoedd canu pob enwad anghydffurfiol. Cam naturiol, felly, oedd i holl gapeli gogledd-orllewin Ceredigion uno i gynnal un gymanfa ganu yn flynyddol, a digwyddodd hynny am y tro cyntaf yng Nghapel Bethel, Aberystwyth, yn 2004.

Cynhaliwyd Cymanfa 2007 ddydd Sul, 13 Mai, yng nghapel Bethel, Tal-y-bont. Cafwyd oedfa deuluol yn y bore ar y thema 'Ffrindiau', a chymerwyd rhan gan blant ac ieuenctid yr ysgolion Sul. Y gŵr gwadd oedd Ifan Gruffydd, Tregaron, ac fe gafwyd gair pwrpasol ganddo. Arweiniwyd cymanfa'r oedolion yn yr hwyr gan Alan Wynne Jones, ac fe gafwyd oedfa fendithiol iawn o ganu mawl dan ei arweiniad.